呢几日好闷

又係为咗等——等星期四翻屋企

9号係老母生日

一直都唔知应该送D乜

不过算啦

佢乜都有，送个蛋糕就算喇

因为实在太无聊

买咗一大堆动画DVD同狂上网down动画连续剧

每日就係上网、睇片、食饭同训觉

因为实在买咗太多游戏

反而提唔起兴趣去玩

总係老想法——总会有时间玩

重温咗《hunter X hunter》同睇咗《电车男》

开始总觉得我点会沦陷到连《电车男》呢种无聊片

但睇完之后想法完全改变晒

《电车男》喺某程度上的确比到我一D满足感

净係睇住伊东美咲个靓样已经兴奋到不得了

咔咔咔咔咔咔咔咔咔咔…………

不过讲真

呢种童话式爱情故事又真係会令人揾翻一D天真

年纪越来越大

有好多天真嘅谂法就会越来越少

唔係唔会去谂

係唔敢去谂

总会有一有天真谂法就会觉得自己幼稚

但认真谂翻下

可能呢种幼稚先係自己最本质最宝贵嘅嘢

《电车男》更令我明白一样嘢

电车男因为恋爱而令佢原本刻板无聊嘅生活丰富起来

而我嘅生活已经丰富到自己都忙唔过来

所以结论係————我根本未需要恋爱

不过

如果日日都可以识到靓女一齐食饭咁都无所谓嘅

忙D都应酬下啦

嘻嘻嘻嘻嘻嘻嘻嘻嘻嘻嘻嘻…………

今日为咗捧琴爷场去咗睇band show

实在感触良多

好想再玩翻band，真係好想好想…………

以前玩band嘅片段今晚又历历在目

嗰种快感又一次燃烧已经冷却咗5年嘅身体

好想再拿翻起昔日嘅老伙伴——Bass

好想再重振当年热血嘅bassman

不过

对于而家嘅我来讲

玩band变成咗一种幻想、变得遥不可及………………

我真係好羡慕今日可以站喺舞台上玩band嘅band友

就算有D水平并唔高

但至少佢哋可以有条件去玩佢哋中意嘅音乐

至少佢哋揾到一班热血嘅人一齐去玩

要有得必会有失

的确——现实始终係现实

前两日

终于完成咗一张自己最想画嘅画

大学生涯以来第一次画自己想画嘅嘢

虽然外界评价very very低

但对我来讲根本就冇所谓

我终于都画咗一张我最中意嘅画

以前我所画嘅画冇keep过一张

但呢张我会好好珍藏！！！